JADRANKO PERANIĆ: BIĆE BOLJE, SVAKO LANI BOLJE
Tekst: Jadranko Peranić
Foto: Hrvoje Hodak
Ljudi dragi, ma popazite malo ovo, mene je sran.
Neki ovo zovu divljim plažama, neki prirodnim. Ma kako ovo neki uopće more nazvat plažama i kad je to priroda znala načinit nešto lipo???
Ko prvo do većine nima ceste nego se čovik mora probijat kroz griblje. Pa kad konačno onako zigreban i zibadan dojde do te “plaže”, tek onda se najde navigan. Nigde ležaljke, ni onih lipih suncobrani i baldehini. Nima ni konobara da mu donese čevapčići i neki lipo piturani koktelčić zlumbrelicon. Nigde blizu nima ni bazena da se more okupat ko čovik, nego mu ostaje samo poć more. Ki je vrag vidil u današnje vrime kupat se mori. Ni onda, nijedan od onih slavnih rimskih cesari se ni kupal mori nego su va kućama činili bazeni. Samo je onaj blentavi Dioklecijan sa Mandrilima igral picigin na Bačvicama, pa je zato i dobil otkaz.
E sad, čoviku je na tim “plažama” ostalo samo poć kupat se u moru. A kako će kad nigde nima tabele, ni skalic, ni neke oznake kadi je ulaz u more, pa se mora peć na suncu i mazat se da ne zgori. Ako ipak ćapa kuraja pa nekako dojde do mora, okupa se pa oće poć van, opet nigde tabele kadi je izlaz iz mora. Čovika more ćapat grč i utopit se dok išće kadi je taj izlaz iz mora.
Ali evo izgleda da tome crnilu i divljim plažama pomalo gre kraj. Ova nova firma od ća, ča je kupila naš Imperjal, nam već pokazuje da more bit lipše. Popazite malo kako su lipo poredili Prvu Padovu. Na sve su mislili i svega ima. Iležaljke i baldehini i sarbun iz uvoza, koktelčići zlumbrelicon i još svega ča triba čoviku ki se došal okupat. Još su pametni i stručni ljudi smislili da, po zimi jugo povuče del toga sarbuna more, a jedan del bura raznese okolo po susedima, tako da svake godine dopelju novi, čisti iz uvoza, pa dojdu tri-četiri bagera to lipo zravnat. I ča je najbolje, puno njih zaradi na tome. I oni ča ki zna kadi lopataju i krcaju taj sarbun, pa kamioni ki to pelju trajekti, bageristi, pa oni na Baliju ča činu baldehini i suncobrani,… Na onim divljima niki ne zaradi niš.
Evo sad da će poredit i Suhopuntu i za to su morali pitat za dozvolu gradsko vijeće. Govoru da je bilo gusto na glasanju i sva srića da su se pokarane bratske stranke pomirile u novoj ljubavi i dale dozvolu. Lipo je da su se pomirili, ipak su od iste petokrake mliko cicali.
E tek ta nova Suhopunta će bit čudo od lipote. Da će zrušit oni stari socijalistički hoteli i načinit novi i lipši i još puno malih. I još da će načinit i akvagani i bazeni. Ne jedan, ni dva nego dvajset i dva bazena. I još da će od jednoga do drugoga teć potočići (to da se zove river po Švicarski). Pa da će doli uz more ono grubo kamenje porazbijat i zravnat i dopeljat sarbun iz uvoza, a voda iz bazeni puna klora i kemije (mora se, da nijedna bakterija ne preživi) će se zlivat u more tako da neće bit rizika da će čovik gaznut na ježa ili oparit na moruzgvu, sve će to ona voda iz bazeni potrovat.
Nadam se da neće stat na Suhopunti nego da će i sve ove druge divlje, prirodne plaže lipo poredit u svomu stilu.
Mislim da bi in mi Rabljani tribali dignut jedan lipi spomenik za sve ovo lipo ča nam činu i ča će još načinit. Fala in!!!
